Էռնեկյանի ընկերությունը դրական է գնահատում «Զվարթնոց» օդանավակայանը «Շառլ Ազնավուր»-ով վերանվանելը

Հոկտեմբերի 31-ին ՀՀ մշակույթի նախարարությունը հայտարարություն էր տարածել, որով քաղաքացիներին հրավիրում էր մասնակցելու «Զվարթնոց» միջազգային օդանավակայանը Շառլ Ազնավուրի անունով վերանվանելու թեմայով հանրային քննարկմանը:

«Զվարթնոց» օդանավակայանը Շառլ Ազնավուրի անունով վերանվանելու մասին խոսակցություններն օնլայն տիրույթում, մասնավորապես՝ ֆեյսբուք սոցիալական ցանցում ծավալվեցին շանսոնյեի մահվանից մի քանի օր անց: Զգացմունքայնության ֆոնին շատերը ցանկություն հայտնեցին ամենուրեք եւ ամեն ինչ դարձնել ազնավուրյան, ինչի արդյունքում էլ ծնվեց «Զվարթնոց» օդանավակայանը «Շառլ Ազնավուր» վերանվանելու գաղափարը:

Մի քանի գրառումներից եւ մեկնաբանություններից հետո գաղափարին արձագանքեց նաեւ մշակույթի նախարարությունը: Հոկտեմբերի 31-ին մշակույթի նախարարությունը վերոնշյալ հարցի վերաբերյալ քննարկմանը մասնակցել ցանկացողներին առաջարկեց մինչեւ նոյեմբերի 5-ը լրացնել հայտաձեւը, ապա /http://mincult.am/home-1-4536-page-0.html/ տեղեկացրեց, որ քննարկման օրվա, ժամի ու վայրի մասին լրացուցիչ կհայտարարվի դիմումների ժամկետի ավարտից հետո՝ մեկ շաբաթվա ընթացքում:

Մշակույթի նախարարության պաշտոնական հայտարարությունից հետո քննադատական եւ խիստ բացասական կարծիքների տեղատարափ սկսվեց: «Զվարթնոց»-ը «Շառլ Ազնավուր» վերանվանելու առաջարկն անողները որակվեցին անհեթեթություն ծնողներ, իսկ գաղափարը կյանքի կոչելուն ուղղված նախաձեռնություն իրականացնող նախարարությունը որակվեց կաբինետային «հանճարի» հերթական մտքի փայլատակում:

Շատերը վստահություն հայտնեցին, որ Շառլ Ազնավուրը կծաղրեր նման որոշման համար, մտահոգություն հայտնեցին, որ մշակույթի նախարարությունը մոռացել է իր իրական գործառույթները եւ ամբոխավարությամբ է զբաղված: Մշակույթի նախարարությանը առաջարկեցին տափակություններով ու միմոսություններով զբաղվելու փոխարեն պարզել, թե ինչեր են կատարվում նախարարության ենթակայության տակ գտնվող ՊՈԱԿ-ներում:

Հիշատակեցին կոմպոզիտոր եւ դաշնակահար Ֆրիդերիկ Շոպենին, վերջինիս անունը կրող Վարշավայի միջազգային օդանավակայանը. «Հերիք չէ՞ սրան նրան նայել ու թութակություն անել: Ի՞նչ գործ ունեք, թե Լեհաստանը Շոպենի անվամբ կոչեց իրենց օդանավակայանը, դա ինչ կապ ունի մեր ազգի անցած ուղու, պատմության հետ»,- գրել էր ֆեյսբուքյան օգտատերերից մեկը:

Մեկ օր անց՝ նոյեմբերի 1-ին, մշակույթի նախարարությունն իր հայտարարությունը արդարացնող եւ փոքր-ինչ հակասող պարզաբանում տարածեց, նշելով, որ «Զվարթնոց» օդանավակայանը Շառլ Ազնավուրի անունով վերանվանելու առնչությամբ նախարարությունը տվել է բացասական կարծիք` ներկայացնելով հիմնավորումներ:

Շեշտենք, որ մինչ այդ նախարարության կողմից որեւէ ձեւով չի հիշատակվել օդանավակայանի հարցը, ավելին՝ վերը նշված բացասական կարծիքի հետ կապված որեւէ հիմնավորում չի ներկայացվել: Տպավորություն էր, թե մշակույթի նախարարությունը հայտարարություն տարածել, նոր էր հարցն ուսումնասիրել, կամ տարածել եւ փոշմանել էր: «Ե՛վ մշակույթի նախարարությունը, եւ՛ կառավարության աշխատակազմը շարունակում են քաղաքացիներից ստանալ «Զվարթնոց» օդանավակայանը վերանվանելու հետ կապված առաջարկներ: Ելնելով վերոնշյալից, որոշում կայացվեց` հանրային քննարկման միջոցով պարզել հանրության գերակշիռ մասի տեսակետը` հիմնավորումներով»,- գրված է մշակույթի նախարարության պարզաբանման մեջ:

Թեժ քննարկումների ֆոնին ՀԺ-ն հետաքրքրվեց՝ անվանափոխման շուրջ քննարկումների մասին տեղյակ է արդյո՞ք «Զվարթնոց» օդանավակայան «Արմենիա միջազգային օդանավակայաններ» փակ բաժնետիրական ընկերության սեփականատեր, արգենտինահայ գործարար Էդուարդո Էռնեկյանը:

Ինչպես տեղեկացրեց ընկերության մամուլի պատասխանատու Գեւորգ Աբրահամյանը՝ «Զվարթնոց» օդանավակայան «Արմենիա միջազգային օդանավակայաններ» փակ բաժնետիրական ընկերությունը տեղյակ է իրականացվող հանրային քննարկումներից, եւ դրական է գնահատում առաջարկը. «Շառլ Ազնավուրն աշխարհահռչակ հայ է, մեր ընկերությունը պատրաստ է այդ անվանափոխությանը, մենք կողմ ենք»:

Մեր հարցին, թե օդանավակայանը «Շառլ Ազնավուր» վերանվանելը ինչպիսի դրական կամ բացասական հետեւանքներ կարող է ունենալ, ըստ պարոն Էռնեկյանի, Գեւորգ Աբրահամյանը փոխանցեց, որ ընկերությունն առաջարկը դրական է գնահատում, իսկ թե ինչ հետեւանքներ կարող է ունենալ, դժվարանում է ասել, ժամանակը ցույց կտա: «Մենք դժվարանում ենք գնահատական տալ տնտեսական տեսանկյունից: Կարծում եմ՝ խնդիրն ավելի շատ բարոյական հարթությունում է եւ մշակույթի նախարարությունը կարող է այստեղ որակումներ տալ»,- ասաց Գեւորգ Աբրահամյանը:

2001 թվականից Հայաստանի կառավարության եւ «Աէռոպուերտոս Արխենտինա» ընկերության միջեւ ստորագրված փոխըմբռնման հուշագրի համաձայն՝ օդանավակայանի կառավարումը 50 տարի ժամկետով տրվել է Էդուարդո Էռնեկյանի ընկերությանը:

Զվարթնոցի կառավարման իրավունքի ձեռքբերումից հետո Էռնեկյանը հայտարարել էր, որ պետք է այնպես անել, որ օդանավակայանը համապատասխանի միջազգային չափանիշներին: Թռիչքային ուղին համապատասխանեցվելու է միջազգային անվտանգության նորմերին, ծառայությունների մակարդակը հասցվելու է ամենաբարձր մակարդակի, որպեսզի դրանց պատճառով ուղեւորները անհարմարություններ չզգան:

17 տարի անց ընկերությունը դրական է գնահատում տարիների իր աշխատանքը, հայտնում, որ բոլոր պարտավորությունները կատարվել են: Միջազգային ուղեւորահոսքի պահանջներին ու չափանիշներին համապատասխան նախագծված «Զվարթնոց» օդանավակայանի նոր մասնաշենքն իր միջազգային անվտանգության գոտիով, մաքսային, ուղեբեռի ստացման նոր համակարգերով, բարձրակարգ ուղեւորների սպասարկման եւ դիվանագիտական սրահներով, հասարակական առեւտրային եւ սննդի գոտիներով մատուցում է բարձրակարգ ծառայություններ:

Հիշեցնենք, դեռեւս ամիսներ առաջ Էդուրադո Էռնեկյանը հայտարարել էր, որ օդանավակայանների կառավարումը փոխանցելու է իր զարմիկին՝ Մարտին Էռնեկյանին: Իսկ ինքը` American International Airports ու Aeropuertos Argentina-2000 ընկերությունների նախագահ միլիարդատեր 85-ամյա Էդուարդոն, պատրաստվում է ժամանակ ազատել յոգայով ու լողով զբաղվելու համար:

Սակայն, ինչպես «Զվարթնոց»-ի մամուլի պատասխանատուն նշեց, պարոն Էռնեկյանը չի հրաժարվում իր որեւէ պարտավորությունից: